Shpeshherë në këtë blog kemi folur për punën e brendimit, andaj kësaj here dua shkurtimisht të përsëris se brendimi është proces kompleks i krijimit dhe zhvillimit të një identiteti specifik për kompaninë tuaj, produktin tuaj ose edhe vet juve personalisht. Brendimi i suksesshëm krijon lidhje emocionale me konsumatorin. Brendi juaj duhet të ofrojë besim, besnikëri, vlerë… andaj reputacioni që krijon brendi juaj duhet të bëjë gjithçka që të plotëson atë çfarë e pret konsumatori.

Ndër elementet kyçe të brendimit janë logoja dhe dizajni i produktit. Kjo e fundit funksionon duke krijuar identitet vizuel, është elementi i cili drejtpërdrejtë bën kontaktin e parë me konsumatorin.
Ambalazhimi i secilit produkt krijohet duke i dhënë atij formë, madhësi, peshë, ngjyrë dhe shumë elemente tjera që e bëjnë atë të dallueshëm nga produktet e konkurrentëve. Por çfarë ndodh kur bëjmë “zhveshjen” e tyre, duke hequr të gjitha elementet që krijojnë identitet vizuel përveç logos dhe emrit të produktit?!!

Nga agjencioni i dizajnit A2591 kanë bërë një eksperiment ku kanë hequr gjithë atë kaos ngjyrash, fotografish e shkronjash nga ambalazhet e disa nga brendet më të njohura, kështu duke krijuar një dizajn minimalistik. E gjithë kjo ndoshta është në kundërshtim me normat e marketingut bashkëkohor që kërkon dizajne më komplekse, por personalisht mua do të më pëlqente që në raftet e shitoreve të shihja këso produktesh që nuk do të më shkaktonin protestë milingonash në tru nga gjithë ai kolorit ngjyrash. Shihni sa bukur duket p.sh. emri “Red Bull” vetëm me simbolin e demit mbi ngjyrën bazë të ambalazhit të pijës më të njohur energjetike! Ose Corn Flakes pa atë ujëvaren nga qumështi. Nejse, ja një pjesë nga portfolio e A2591: